Italia bizilekutzat duen Torres Maldonado mexikarrak jarduera zabala garatzen du konpositore eta irakasle gisa. “Broken columns in a false horizon” obrak ondo orraztutako bi elementutan oinarritutako diskurtsoa garatzen du:
- hedatuz edo uzkurtuz doazen pultsazioak, eta
- keinu linealak, hala nola eskala zabalak edo arpegioak, hegakorrak instrumentuen erregistro osoan zehar.
Félix Ibarrondo egungo euskal sortzaile handienetako bat dugu. Bere konposizioak nazioarte mailan ospetsuak diren taldeek interpretatu izan dituzte. Kritikoek Félixek duen adierazpen-indarra nabarmentzen dute, bai eta bi aldeetara konektatzeko eta komunikatzeko duen gaitasuna ere: bai interpreteekin, bai publikoarekin. Besteak beste, Arte Ederren Merezimenduaren 2018ko Urrezko Domina eta 2019ko Musika Sari Nazionala jaso ditu, konposizioaren kategorian. “Volutas” lanak bere azken sorkuntza-aldiko estilo soilaren eta landuaren ezaugarri nagusiak laburbiltzen ditu.
Fiammetta Pasi musika-konposizioan lizentziatu zen Milango Musika Kontserbatorioan, eta Giacomo Manzoniren eta Franco Donatoniren ikastaroetan parte hartu zuen Fiesolen eta Sienan. Gerora, musika elektronikoaren esparrura zabaldu zuen bere interes musikala nahiz sormena. Gaur egun, Stanford ‘s Center for Computer Research in Music & Acoustics (CCRMA) zentroko irakasle gonbidatua da. Haren lanak Italian eta Estatu Batuetan estreinatu eta interpretatu dira.
María Eugenia Luc-en “Figlia dell’ aria” flauta bakarrerako obra bat da, Radio Francek 2023an enkargatu eta Mario Caroli bakarlari ospetsuak grabatu eta estreinatu zuena. Konpositorearen hitzetan, izenburuak (“airearen alaba”, euskaraz) musikaren definizio poetikoa izan nahi du. Obra bost miniaturako serie bat da, eta jatorrizko materialak hainbat eratan garatzen dira horietako bakoitzean.
Kontzertua Zuriñe F. Gerenabarrenaren “Eutsi” konposizioarekin amaitzen da. Obra horrek musika elektroakustikoaren eremuan taldeko instrumentuei aplikatuta izandako bere tinbrezko bizipenak laburbiltzen ditu, modu arrakastatsu eta sinesgarrian bildu ere. Azken zatian, interpreteek errezitatutako hitzen erabilerak (errebindikazio esanahiarekin) testura bat sortzen dute, soinu diskurtsoan txertatuz.
Kontzertua, Kuraia Musika Garaikidearen XXXI. Topaketarekin lankidetzan